MENU LOG IN CART {{currentCart.getItemCount()}}

技術分享 - 003(c) Spectra® Fiber

上一期介紹咗一個做UHMWPE 做得好出色嘅物料品牌Dyneema®,今期要講嘅係同屬UHMWPE 嘅另一個Brand Spectra® Fiber。的而且確,Spectra®同Dyneema®所生產嘅UHMWPE纖維,無論喺功能,重量,耐用度方面都無大分別。但係喺應用層面就有小小唔同,Spectra®大多數物料本身都係用作保護護具,例如電單車頭盔,避彈衣,甚至係防彈車裝甲上面。當然,呢啲用喺護具上面嘅Spectra®絕對唔會聯想到同布有關啦。


近年,Spectra®見到對家將物料應用喺戶外上做得咁好,佢地都想進佔呢個市場。於是同Dyneema®一樣,開始將UHMWPE以不同形式放入戶外布料入面。令本人最欣賞嘅地方,佢地用上一種我最認同嘅方法去提供多一個選擇俾大家。就係好似X-Pac™咁,以多層貼合方法,將布料Upgrade。如果再重申,呢種多層貼合方法嘅好處(用上傳統戶外布,例如Ripstop, 痴一層Spectra®,布底再痴一層Coating咁就可以增強再增強布料嘅耐用度,而重量唔會對等咁提高。)同樣做法,但由X-Ply™改為Spectra®,重量節省更多。

 

整個七月分別介紹咗三種不同新物料,各有長處,1) X-Pac™(耐用型) 2) Dyneema® Composite Fabric (輕量型) 3) Spectra® Micro Grid(平衡型)。如果你有留意我地產品,我地一向都選用X-Pac™,主要原因係佢嘅功能,重量上都以經比傳統戶外布料優勝,但耐用度同價錢比其他新物料較好。同時間,睇到Spectra®開始慢慢Offer 多種UHMWPE嘅應用方法而且喺布料製造技術上有更多創新嘅諗法(雖然質素有啲參差)。若然你呢一刻叫我揀一隻布俾你做背囊,我依然會揀X-Pac™,不過半年後仲係咪呢三種物料呢,就未知之數了。