MENU LOG IN CART {{currentCart.getItemCount()}}

技術分享 - 003(a) X-Pac Fabric

嚟緊三期技術分享會同大家講一講戶外新興布料,於第三期(7/31刊登) 會有我地對呢啲新興布料嘅睇法。

 

今日首先介紹係X-Pac™ 布料,X-Pac™係由一間美國布料廠生產嘅一系列戶外布料。佢地最初係做競賽帆船上面個啲帆。呢度用[布料廠]呢個字,但係你見到實物完全唔覺得係布,擺明係一大塊膠啦師兄。唔理係布又好,膠又好,呢個美國廠都唔小來頭,一級嘅比賽帆船好多都係用佢地嘅產品。因為佢地有一樣專利技術,叫X-PLY™,呢個技術大家都唔會陌生,就係X-Pac™上面個一層X形狀嘅Layer。

 

X-PLY™過往都有些微改變,喺好早期嘅時間,呢一層X-PLY™係用好薄嘅鋼絲去做。隨住技術慢慢轉變,呢一層X-PLY™都由鋼絲換上一札強纖維,於是佢地嘅布料又再輕咗再耐用咗。

 

用係帆船上,將幾層X-PLY™痴埋一齊,就做成一塊又輕而抗扯力極強嘅布,但係呢塊布十分硬,就連對摺都好難做到。咁嘅情況又點會用到落背囊呢啲Soft Goods上面呢?

 

於是有位智者就話,呀,反正我地都係痴痴下,不如試下將傳統戶外布痴多層X-PLY™睇下會發生咩事?就係咁,我地就有X-Pac™用了! Idea 好簡單,用上傳統戶外布,例如Ripstop, 痴一層X-PLY™,布底再痴一層Coating咁就可以增強再增強布料嘅耐用度,而重量唔會對等咁提高。

 

本文重點有三。
一,X-Pac™ 係呢間美國公司為佢地戶外系列所申請嘅專利名稱。
二,X-PLY™係呢間美國公司為佢地中間個層X形狀Layer 所申請嘅專利名稱。呢一層Layer,係由一札高強度纖維所組成並貼合。
三,X-Pac™係由三層不同成份以貼合方法所組成嘅布料,由於配合戶外需要,最表層通常係傳統戶外用品常見嘅布料。如果你剪開塊布,會見到呢三層不同Layer (曾於大陸見過假X-PAC, 個層X-PLY 係Print 上去的)