MENU LOG IN CART {{currentCart.getItemCount()}}

技術分享 - 002 縫合方法 燙貼/熱焊接

今次同大家分享嘅技術文,係縫合方法—燙貼/熱焊接。

 

一般紡織品都會採用衣車再配合不同嘅針線去完成縫紉,呢種方法已經存在咗好多年所以基本上十居其九,都會用呢種方法去縫合。

 

但係呢種方法如果用喺防水用具上面,就不太適合。因為就算布料本身已有好強嘅防水功能,一旦用傳統針縫,每一下線步都會由針穿過而產生針孔,水就會由針孔滲入。

 

要做到完全防水嘅縫合,今日會分享兩種。

 

第一種,非常常見,如果你係露營友,可能已經親身試過自己DIY,就係燙貼。Seam Tape,呢啲燙貼簡單易用,適用於普遍人造纖維。好多時使用上不需要加熱,直接貼上本身有縫線地方,就可以堵塞針孔。再高級小小,話明係燙貼,當然要加熱。加熱就係為咗令燙貼上身嘅膠水形成半液體,然後再施加少許壓力將膠水平均咁附喺物料上。因為有加熱呢個步驟,令到呢種燙貼可以直接代替縫線。其中一個常見例子就係Gore-tex 外套裡面,就有一條條呢啲燙貼。

 

第二種,熱焊接,今次有一點承上題,上次介紹TPU係一種熱塑性物料,加熱到指定溫度會變液體化,降溫就會變返本來固體,而且呢個情序可以重覆。上次講到,有位聰明人溶咗啲TPU落布要做出好好嘅防水物料。跟手有另一位智者就諗到,既然針縫唔得,不如運用返TPU特性,等佢地自己痴自己啦。就係咁就出現咗熱焊接呢個技術,完全無需再加另一種物料,純粹用物料本身特性就可以做出耐用又防水嘅縫合方法。

 

以上兩種縫合方法各有優劣。
燙貼—可以應用喺較多物料上,而且不同燙貼可以有不同特性,例如有彈性,防水透氣。但耐用度唔高,特別係千其唔好放入乾衣機,否則好多不耐高溫嘅燙貼會脫落。

 

熱焊接—只適用於熱塑性物料,耐用度比燙貼好,完成後較簡潔美觀,而且對環境溫度較不敏感。壞處就係呢種生產方法相對較貴,而且設計好容易受焊接機器所限制。